काठमाडौं– सरकारले गणेश नेपाली आत्मदाह घटनाको छानबिन गर्न छानबिन समिति गठन गरेको छ ।
शुक्रबार प्रतिनिधिसभा बैठकमा आत्मदाह घटनाका बारेमा जानकारी गराउँदै गृहमन्त्री सुधन गुरुङले उक्त घटनाको छानबिनका लागि डीआईजी गोविन्द थपलियाको नेतृत्वमा ५ सदस्यीय छानबिन समिति बनाइएको जानकारी दिए । उनले उक्त घटनाको छानबिन तथा सोधपुछका लागि तीन जना महानगर प्रहरीलाई नियन्त्रणमा लिइएको बताए ।
बोल्ने क्रममा निकै भावुक भएका गृहमन्त्री गुरुङले नेपालीको जीवन रक्षाका लागि सरकार गम्भीर भएर नै उपचारका लागि भारत लैजाने प्रयास गरेको उल्लेख गरे ।
तर चिकित्सकको सल्लाह अनुसार भारत लैजाने अवस्था नदेखिएपछि वीर अस्पतालमा नै चिकित्सकहरूले उपचारको सक्दो प्रयास गरेको उनले बताए ।
आत्मदाह घटनाप्रति विपक्षी सांसदहरूले गरेको टिप्पणी प्रति गृहमन्त्री गुरुङले आफूलाई स्टन्ट गर्ने इच्छा नभएको भन्दै देशको सेवा गर्न आफू पछि नहट्ने उल्लेख गरे ।
उनले उक्त घटना संघीय सरकारको कारण नभई स्थानीय सरकारको नियम पालना गराउने क्रममा घटेको बताए ।
घटनालाई लिएर वर्तमान सरकारलाई आरोप लगाएको भन्दै उनले नेपालीले आत्मदाह गरेको घटना घटेको स्थानीय तहमा कुन दलको सरकार छ ? भन्दै प्रश्न गरे । त्यस्तै गृहमन्त्री गुरुङले देश बनाउनका लागि सत्तापक्ष र प्रतिपक्षी नभनी सवै एकै ठाउमा उभिनुपर्ने धारणा राखे ।
