कैलाली ।डोटीको छहरा झरना प्रवेश गर्न शुल्क निर्धारण गरिएको छ । जोरायल गाउँपालिकाको वडा नम्बर २ ले प्राकृतिक छहरा झरना प्रवेशका लागि शुल्क तोकेको हो ।
वडा कार्यालयले सोमबार एक सूचना जारी गर्दै प्रसिद्ध पर्यटकीय स्थल छहरा झरनाको विकासका लागि राजश्व सङ्कलन गरी झरनाको विकास गर्न प्रवेश शुल्क तथा पार्किङ शुल्क उठाउने निर्णय गरिएको जनाएको छ । वडा अध्यक्ष वीर बहादुर दर्लामीद्वारा जारी सूचनामा साउन २१ गते वडा समिति तथा जोरायल गाउँपालिकाले शुल्क तोक्ने निर्णय गरेको उल्लेख छ ।
जसअनुसार अब आन्तरिक पर्यटकले छहरा झरना अवलोकन गर्न प्रति व्यक्ति २० बाह्य पर्यटकले ५० र विद्यार्थीले १० रुपैयाँ शुल्क तिर्नुपर्ने छ ।
यस्तै सवारी पार्किङको शुल्क पनि निर्धारण गरिएको छ । जसअनुसार बाइक (मोटरसाइकल) २०, जिप/भ्यान/कारको ५० र बस तथा ठुला सवारी साधनको १ सय रुपैयाँ पार्किङ शुल्क तोकिएको छ । प्राकृतिक झरनाको शुल्क लिएपछि सर्वसाधारणबाट भने यसको विरोध गरिएको छ ।
