बौनिया ।कैलालीको बर्दगोरिया ५ मा रहेको ठाकुरद्वारा पार्क परिसरमा निर्माण गरिएका थारु कला तथा संस्कृतिसँग सम्बन्धित विभिन्न मूर्तिहरूको औपचारिक उद्घाटन गरिएको छ।
उद्योग, पर्यटन, वन तथा वातावरण निवर्तमान मन्त्री माननीय रमेश्वर चौधरीको करकमलबाट पार्क परिसरमा निर्माण गरिएका थारु कला–संस्कृतिका मूर्तिहरूको उद्घाटन गरिएको हो।
उद्योग, पर्यटन, वन तथा वातावरण मन्त्रालयबाट विनियोजित १० लाख रुपैयाँ बजेटमा उक्त मूर्तिहरू निर्माण गरिएको बताइएको छ। थारु समुदायको मौलिक कला, संस्कृति, परम्परा र सांस्कृतिक पहिचानको संरक्षण तथा प्रवर्द्धन गर्ने उद्देश्यले निर्माण गरिएका मूर्तिहरूले ठाकुरद्वारा पार्कको आकर्षण थप बढाउने अपेक्षा गरिएको छ।
पार्कमा विभिन्न थारु कला–संस्कृति झल्काउने मूर्तिहरू निर्माण भएपछि स्थानीय बासिन्दासँगै पार्कमा आउने पर्यटकहरूले थारु समुदायको मौलिक जीवनशैली, कला र सांस्कृतिक पहिचानलाई नजिकबाट अवलोकन गर्न पाउने भएका छन्।
यसबाट स्थानीय पर्यटन प्रवर्द्धनसँगै थारु कला तथा संस्कृतिको संरक्षणमा समेत महत्वपूर्ण योगदान पुग्ने विश्वास गरिएको छ।
यसै क्रममा चर्चित कलाकार तथा स्थानीय कला–संस्कृतिको क्षेत्रमा योगदान पुर्याएका वीर चौधरीको मूर्ति समेत निर्माण गरिएको छ। वीर चौधरीको योगदानलाई सम्मान गर्दै निर्माण गरिएको उक्त मूर्तिले स्थानीय कला तथा सांस्कृतिक इतिहासलाई थप जीवन्त बनाउने अपेक्षा गरिएको छ।
मूर्तिहरूको निर्माण तथा औपचारिक उद्घाटनसँगै ठाकुरद्वारा पार्कलाई स्थानीय संस्कृति, पर्यटन र मनोरञ्जनको महत्वपूर्ण गन्तव्यका रूपमा विकास गर्न थप टेवा पुग्ने देखिएको छ। स्थानीय सरोकारवालाहरूले यस्ता सांस्कृतिक सम्पदाको संरक्षण, व्यवस्थापन र प्रचार–प्रसारमा निरन्तर ध्यान दिनुपर्नेमा जोड दिएका छन्।
